ඇයි හත්තිලව්වේ මිනීමැරීම්, පැහැරගැනීම්, ස්ත්රී දුෂණ වලින් පිරුණ මේ රටේ ආදරයට ඉඩක් ඇත්තෙම නැද්ද..??? එහෙම නැත්තම් අපි දෙන්නට ඇරෙන්න මේ රටේ අනික් උන්ට ආදරේ Phobia එකක් තියෙනවද..??? මේ අත්දැකීමට මුහුණ දුන්නට පස්සේ මගේ හිතට ගලා ගෙන එන්න ගත්තේ මේ වගේ අදහස්.
ආදරය ගැන මේ තරම් කවි ගීත ලියවුන රටක ආදරවන්තයන්, යොවුන් අපරාධකාරයන් විදියට හංවඩු ගහන්නේ ඇයි..???
ග්ර්ර්ර්.... තවමත් මගේ හිත මට අවනත නෑ...
ඔබත් සමහරවිට මේ අත්දැකීමට මේ වෙනකොට මුහුණ දීල ඇති. එහෙම නැත්තම් වෙනත් කෙනෙක් මුහුණ දෙනවා දැකල ඇති. ඒ තරමට දැන් මේක මේ රටේ සාමාන්යකරණය වෙලා.
පෙම්වතුන් බැහැර කිරීම
හිටිගමන් පොලිස් රාළහාමිලා කඩා පැන පාරවල් වල හෝ උද්යානවල සිටින පෙම්වතුන්ගේ හැඳුනුම්පත් පරික්ෂා කිරීම, බංකුවක් මත තුරුළු වී සිටින පෙම්වතුන් ඉවත් කිරීම, හිටිගමන් පෙම්වතියගේ වයස අසා සිටීම....
මේ පිළිකුල් සහගත ක්රියාදාමයට මට මීට වඩා සුදුසු නමක් හොයා ගන්න මට බැරි උනා.
පේරාදෙණිය උද්යානයේදී පොලිස් රාලහාමි කෙනෙක් ඇවිත් මගේ පෙම්වතියගේ වයස අසා සිටි අවස්ථාවේදී නම් මගේ ඉවසීමේ රතු කට්ට එලියටම පැනල දුම් දාන ගානට ලඟා උනා.
"උඹේ අම්මගේ වයස!"
පොලිස් අංකල්ට වයස 35ක් විතර ඇති. ආදරේ කරලා, කෙල්ලත් එක්ක රවුම් ගහල බංකු උඩ, ගස් යට තුරුල් වෙලා හිටිය කාලේ අමතක වෙලා තියෙන්න නැතුවත් ඇති. එහෙමත් නෙවේ නම් කට උත්තර නැති වෙන්න ඇති. ඒ දෙකම නෙවේ නම් මූව කොහෙන් පට්ට ගහන්න පටන් ගන්නද හිතා ගන්න බැරි වෙන්න ඇති. මාත් ඕනේ දෙයක් වෙද්දෙන් කියල හිතා ගෙන හිටියේ.
අංකල් යන්න ගියා.
මම සොඳුරියගෙන් නැති වෙන්න බැනුම් අහගත්තා. ඒ වෙලේ මම හිතා ගත්තා මේ පිළිකුල් සහගත ක්රියා දාමයට එරෙහිව බ්ලොග් පෝස්ට් එකක්වත් ලියන්න ඕනේ කියල.
මේ රටේ ලඟකදී ඉඳං සියලුම ප්රශ්න අතරින් දැවෙනම ප්රශ්නය බවට පත් වෙලා තියෙන්නේ ආදරය බවයි පෙම්වතුන් බැහැර කිරීමේ ක්රියාදාමය දකින ඕනෙම විදේශිකයෙකුට හිතෙනවා ඇත්තේ. හිටි ගමන් කඩා පැන පෙම්වතුන් බැහැර කිරීමේ ව්යායාමයේ සදාචාරාත්මක පැත්ත කෙසේ වෙතත් එහි අනුකූලතාවය හා අවශ්යතාවය ගැන ගැටළු මතු වෙනවා.
ධර්මද්වීපය තුල සෑම මිනිත්තු 10ටම වරක් රිය අනතුරක් වන අතරේ, සෑම මිනිත්තු 20ටම වරක් අපරාධ ගණයට වැටෙන ක්රියාවක් (ස්ත්රී දූෂණ, පැහැරගැනීම්, මිනී මැරීම් ආදී) සිදුවන අතරේ ඒ පිලිබඳ සොයා බැලීම පසෙක ලා මල්වතු තුල හෝ වෙරළවල් වල තුරුළු වී සිටින පෙම්වතුන් ඉවත් කිරීමට පොලිස් රාළහාමිලා යෙදවීම ආශ්චර්යට යන්න ගමනේම කොටසක් වෙන්න ඇති.
මොකද එහි වෙනත් කිසිම වැදගත්කමක් තිබෙන බව මට හැඟෙන්නේ නැති නිසයි.
නොකෙරෙන වෙදකමට කලාඳුරු තෙල් හත්පට්ටයක් ඕනේ කිව්වා වගේ ආශ්චර්යට යන ගමනේ අනික් වැදගත්ම කොටස ගැහැනියක් සහ පිරිමියෙක් ආදරයෙන් වෙළීමට අවම වයසක් පැනවීම සහ වයස අවුරුදු 18 ට අඩු පෙම්වතුන් නීතිය ඉදිරියේ වැරදි කරුවන් කිරීම විය හැකියි.
හොඳයි, කවුරු හරි මෙහෙම කිව්වොත්...
"පෙම්වතුන් අසභ්ය ආකාරයට හැසිරෙන ආකාරය දැකල කුඩා ළමුන් නොමග යනවා.."
කිව යුතුමයි.
යුවලක් ප්රසිද්ධියේ නිර්වස්ත්රයෙන් හැසිරෙන්නේ නම් ඔවුන් එතනින් ඉවත් කිරීම පිලිබඳ කිසිදු ගැටළුවක් මතුවෙන්නේ නැහැ. නමුත් මම හිතන්නේ නැහැ ශ්රී ලංකාව තුල එවැනි සිදුවීමක් අපි කිසිවෙක් විසින් අත්විදින්න ඇති කියල.
නමුත් බංකුවක් උඩ තුරුළු වී සිටින පෙම් යුවලක් අසභ්ය ආකාරයට හැසිරෙන්නේ යයි වර්ග කරන්නේ නම් ඒ නිගමනය කරන පුද්ගලයින්ගේ මානසික සෞඛ්යය පිළිබඳව ගැටළු මතුවෙනවා.
මේ ලෝක ප්රකට ඡායාරූපය මීට කලින් ඔබ දැකලත් ඇති. නොදැක සිටීම දඬුවම් ලැබිය හැකි වරදකුත් නෙවෙයි.
 |
| V-J Day in Times Square, a photograph by Alfred Eisenstaedt, was published in Life in 1945 with the caption, In New York's Times Square a white-clad girl clutches her purse and skirt as an uninhibited sailor plants his lips squarely on hers |
දෙවන ලෝක යුද්ධය නිම වීමේ ප්රීතියට ඇමරිකානු සේලරුවෙක් ටයිම් චතුරස්රයේදී පාරේ සිටි ගැහැනියක් ඇද සිපගත් අවස්ථාව දැක්වෙන මේ ඡයාරූපය දැනට ලෝකයේ ප්රසිද්ධම සිප ගැනීම ලෙස සැලකෙනවා.
නමුත් යම් හෙයකින් මෙවැනි දෙයක් ශ්රී ලංකාවේ සිදු වුනා නම් මේ දකින පුද්ගලයින් විසින් තවත් එක "අසභ්ය දර්ශනයක්" ලෙස වර්ග කරනවා නොඅනුමානයි.
යුරෝපීය රටවල් තුල (ඒ රටවල් වල අපරාධ අනුපාතිකය ශ්රී ලංකාවට වඩා අඩු බව කරුණාවෙන් සලකන්න) ප්රසිද්ධියේ සිප ගැනීම පවා වරදක් ලෙස නොසලකන අතරේ (ඊට වඩා අපරාධ අනුපාතිකය වැඩි) ශ්රේෂ්ඨ ශ්රී ලංකේය සභ්යත්වය තුල පෙම්වතුන් යුවලක් ලංවී සිටීම පවා වරදක් ලෙස සලකනවා. පාසල් ඇඳුමෙන් සැරසුන පෙම් යුවලක් දුටු තැන අපරාධකරුවන් ලෙස මෙන් එළවා ගොස් අල්ලන්නේ, තවත් ඊට වැඩි අපරාධයක් ලංකාවේ නැති ගානටයි.
මට හිතෙන විදියට...
පෙම්වතුන්ට උද්යාන තහනම් කලාප බවට පත් කරන්නේ නම්, ගාලු මුවදොරින් එළවා දමන්නේ නම් ඔවුන්ට ලබා දෙන එකම විකල්පය හෝටල් කාමරද...?? එය ශ්රී ලංකාවේ අපරාධ ප්රතිශතය අඩු කිරීමට ඉවහල් වේ යයි සිතීමට කිසිම සාක්ෂියක් නැහැ. මිනිසුන්ගේ සිතිවිලි වලට වැට කඩුලු දමන්නේ නම් හෝ ඔවුන්ගේ ක්රියාකාරකම් අරබයා බලය පතුරවන්නේ නම් එය රටක සභ්යත්වයේ ප්රගමනයට කිසිම අකාරයකින් දායක වෙන්නෙත් නැහැ.
මේ ආකාරයට ගියොත්....
කරුණාරත්න දිවුල්ගනේ මහතා ගැයූ "ආදරය සුන්දර වරදකි" ගීතය මේ ආකාරයට වහාම වෙනස් කරන්නට සිදු වෙනවා.
"ආදරය බරපතල වැඩ සහිතව සිර දඬුවම් ලැබිය හැකි වරදකි"
Posts
